بدعم من نقابة الصحافة. ها فوقاش قررو صحافيو "أخبار اليوم" يديرو إضراب عن العمل

قرر جميع العاملين فجريدة "أخبار اليوم"،المنتمون للنقابة الوطنية للصحافة المغربية، يديرو إضراب عن العمل لمدة 24 ساعة يوم الخميس 6 يناير 2021.
هذ الإضراب جا "نظرا للظروف الاجتماعية التي يعيشها طاقم جريدة "أخبار اليوم" الصادرة عن مؤسسة MEDIA21 جراء تماطل الإدارة في صرف أجورها وتسوية أوضاعهم وحقوقهم الاجتماعية المنصوص عليعا بموجب قانون الشغل والاتفاقية للجماعية"، كيف قالت فبلاغ ليها، اليوم الثلاثاء.
ومن المرتقب يشاركو فهذ الإضراب جميع الصحافيين والتقنيين والتجاريين والإداريين المتضررين من الأزمة اللي كتعاني منها الجريدة، بعدما ماتوصلاتش بالدعم اللي عطاتو وزارة الثقافة للصحافيين فجايحة كورونا، وتماطلات الإدارة ديالها فصرف 2 شهورا للعاملين، مع تسبيق 25 فالنية من شهر واحد فقط.
وفندوة ليهم تدارت لبارح ففرع النقابة الوطنية للصحافة فكازا، للتعريف ببرنامجهم الاحتجاحي، قالو صحافيي الجريدة أنهم كيفكرو فالتصعيد إلى ماوصلوش مع الإدارة لحل، كيف كيطالبو بالحديث معاها والجلوس على طاولة الحوار بوضع حد لهذ الأزمة اللي تكرفصو معاها بزاف.