نايضة بين الجدرامية والبزناسة في حد السوالم نواحي كازا. حملة جديدة طيّحات روشيرشي مخلطها حشيش وغبرة وماحية

حملات الدرك الملكي بمنطقة حد السوالم (ضواحي كازا) طيحات مساء الاربعاء الفايت بزناس جديد تابع لشبكة ديال بارون مخدرات معروف وغابر هاذي مدة هربا من مذكرات بحث على المستوى الوطني. هاذ المروج هو عضو في شبكة مكونة من 12 بزناس تابعين لشبكة "لمسلك".
البزناس اللي تشد حتا هو روشيرشي وتشد بعد ما هرب من كمين للجدرامية ومشا لمخبأ سري ديالو. وبعد اعتقاله مشا معاهم للدار من أجل اجراءات التفتيش بناءا على تعليمات النيابة العامة، عناصر الدرك اللي استعانت بالكلاب البوليسية المدربة، لقاو بلاصة مخبية حاط فيها كمية من الكوكايين والكيف والحشيش والماحية. كما تم حجز قطيع من الكلاب الشرسة كان مربيها البزناس و كيحرشها على الجدرامية والغرباء.