جديدة هذي. وزيرة سابقة كتروج الفايك نيوز.. ها حقيقة موت سعاد صابر اللي نشراتها بسيمة الحقاوي.. وبنتها ل"كود": هذشي ما كاينش وحنا عيينا من هذ الإشاعات وماما كتهضر دابا مع الوزيرة اللي غدي تكذب هذشي من دابا شوية

نشرات وزيرة التضامن والمساواة والأسرة والتنمية الاجتماعية السابقة، بسيمة الحقاوي، فايك نيوز قداشناهي فتدوينة على صفحتها الرسمية على موقع التواصل الاجتماعي "فيسبوك"، كتقول فيها أن الممثلة المغربية المقتدرة سعاد صابر توفات.
وقالت الوزيرة، فالتدوينة اللي جرات تمسحها، أنه "قبل 6 سنوات، ساهمت الفنانة صابر في الحملة الثانية "الناس الكبار كنز فكل دار"، واليوم تتوفاها المنية في نفس هذه المناسبة التي يحتفى فيها بالمسنين…"، ورفقات التدوينة بمقطع فيديو ديال الحملة اللي دارت الممثلة.
وباش تتأكد من الخبر، اتصلات "كود" بالفنانة، وجاوباتها البنت ديالها اللي قالت أن هذشي كلو كذةب فكذوب، "وحشومة كل مرة يروجو على الأم ديالي هذ الاخبار بشكل مستمر ومتكرر، وحنا فكل مرة كنتهولو ونتخلعو، والله يطول لينا فعمرها".
وزادت نجلة الفنانة، أن الناس خاصهم قبل ما ينشرو شي خبر يتأكدو منو، خصوصا منهم المسؤولين والصحافيين، ويتصلو ويسقسيو، ماشي يجريو ينشرو الإشاعات بدافع ربح الكليك والبوز.
وقالت أن سعاد صابر فهذ الأثناء كتتكلم فالهاتف مع الحقاوي، وأن هذ الأخيرة غادي تدير تكذيب وتوضيح للخبر اللي نشرات من دابا شوية فالصفحة ديالها الرسمية.