معهد باستور فليل فشمال فرنسا اكتشف دوا يقدر يكون فعال ضد كورونا.. ومدير المعهد: غادي نديرو تجارب سريرية وإلى تأكدنا انه مزيان غنبداو نخدمو بيه ف2021

معهد باستور فمدينة ليل ففرانسا طور فالمختبر ديالو تركيبة تبثات فعاليتها ضد على فيروس كورونا، هذ التركيبة ديجا موجودة فواحد الدوا فالسوق، وغادي يتم التأكد من فعاليتها من خلال التجارب السريرية، وإلى كلشي داز مزيان غادي تكون موجودة فاللول ديال 2021، والأمل فيها كبير.
البروفيسور بينوا ديبريز، المدير العلمي ديال معهد باستور فليل، قال فهذ الصدد "لقينا فالمختبر ديالنا تركيبة موجودة فالعنصر النشيط من واحد الدوا موجود، ولقينا أنها فعالة ضد فيروس كورونا، وحنا جربناها على الخلايا ديال الرية، والنتائج اللي توصلنا بيها مبشرة.
وهذ السابقة هي ثمرة ديال عمل وبحث جبار بدا من مارس وتلونصا مع كونكور دارتو شركة Apteeus المختصة فتغيير وضعية الأدوية، كيزيد المدير "التحديد ديالنا دابا هو ندخلو نيشان فمرحلة تقييم الفعالية ديالها.. حيت كيمكن لينا نشتغلو عليها حيت هذ التركيبات عندهم لوطوريزاسيون باش يتباعو فالسوق".
وهضر المدير على نجاعة هذ التركيبة وقال: "حنا قدرنا نبرهنو بأن العنصر النشيط فهذ الدوا قادر يقتل الفيروس بتركيز 30 مرة أقل من الدوا اللي تم اقتراحو بالأساس"، لكن شاف أن هذ الدوا ماعندوش أعراض جانبية، أتوافع دوائي خطير، وممكن يتخاذ بسهولة.."
باش يبدا التجارب، خاص معهد باستور فليل يجمع 5 مليون أورو، فواحد السياق فيه كيلشي كينتظر ويترقب : "غنديرو تجارب سريرية صارمة، غنحترمو فيها كَاع مراحل الإجراء... والتجربة الاولى بينات أن هذ الدوا كيقلص الشارج ديال الفيروس فالدات، وكيجنب انتقال العدوى وتطور الفيروس لمرحلة خطيرة، هذ الدوا كيخدم كمضاد للفيروس وماشي مضاد للالتهاب"، حسب مدير المعهد.
وحرص ديبريز على السرية ومابغاش يقول سمية هذ الدواء: "مانقدوش نعطيو سميتو، حيت هو قليل فالسوق، وحنا محتاجين للريزيرف باش نديرو الأبحاث.. وإلى نجحات الأبحاث غادي نبداو نستعملو هذ الدوا فاللول ديال 2021′′، حسب كلامو.