بعد الانفجار الضخم اللي قتل 190 واحد... العافية شعلات تاني فمرفأ بيروت

مادازش بزاف على انفجار مرفأ بيروت حتى شعلات العافية، اليوم الخميس، فمخزن الزيوت وإطارات السيارات فنفس المرفأ، مخلفة وراءها خسائر مادية ضخمة.
والعافية شعلات تحديدا فالمنطقة الحرة بالمرفأ وقاست حتى صوامع الحبوب الخرسانية اللي تدمرات بسبب الانفجار الأول اللي وقع فالشهر اللي فات.
وجاو رجال البومبية يطفيو الحريق اللي مازال لحد الساعة ماتعرف السبب ديالو.
وماتو فالانفجار اللي فات 190 واحد وتدمرات مساحة كبيرة من بيروت، وآلاف الأسر لقاو راسهم بدون مأوى.
والأبحاث كشفات أن الانفجار اللول تسببات فيه كمية ضخمة من نترات الأمونيوم اللي بقات مخزنة فالميناء لسنوات دون مراعاة لإجراءات السلامة.