جمعيات المجتمع المدني كتطالب الفتيت بتأجيل الدخول المدرسي حتى لدجنبر

وجهات جمعيات المجتمع المدني مراسلة لعبد الوافي الفتيت، وزير الداخلية، كتطالبو فيها بتاجيل الدخول المدرسي حتى لدجنبر.
وجا هذ المطلب، حسب الرسالة اللي كتتوفر عليها "كود"، حتى تتاضح الرؤية بشأن الوضعية الوبائية فالبلاد".
وكشفات الجمعيات أن الجامعة الوطنية حول الدخول المدرسي دارت استطلاع رأي لأزيد من 3500 جمعية، واللي بين أن 80 فالمية منهم مع التعليم الحضوري، و15 فالمية مع التعليم عن بعد، بينما جمعيات المجال القروي كانو كاملين مع الحضوري.
وطالبات الوزير باش يتدخل ل"حماية الوطن والمواطنبن من كارثة وبائية خطيرة"، منتقدة فنفس الوقت قرار وزارة التربية الوطنية اعتماد التعليم عن بعد كصيغة تربوية لجميع الاسلاك، باستثناء المتعلمين اللي غيبغيوهم واليديهم يحضرو.
واستحضرات أخر الأرقام اللي جابتها المندوبية الساملة للتخطيط، واللي كتقول ان 80 فالمية من التلاميذ مواكبوش التعليم عن بعد، ونسبة مهمة منهم فالعالم القروي، كيف قالت أنه مكايناش قدرة لانتاج محتوى رقمي جيد، وكاينة صعوبة لوصول المنصات التعليمية الافتراضية.
وطرحات الجمعيات تساؤل طرحوه مجموعة من المراقبين قبل حول ما إلا بغاو جميع الآباء التعليم الحضوري او اغلبهم، واش ممكن لهذ التلاميذ يقراو بلا ينتشر وسطهم كورونا، وكيفاش ممكن وزارة التعليم تحميهم.