نقابة تعليمية دخلات على خط وفاة إطار تعليمي مات بكورونا بسبب الإهمال.. استنكرات هذ "السياسة الصحية اللامسؤولة" وطالبات بفتح تحقيق

عبرو أطر التخطيط والتوجيه التربوي، التابعين لنقابة الجامعة الوطنية للتعليم FNE (التوجه الديمقراطي)، على إدانتهم ل"السياسة الصحية اللامسؤولة" كيف وصفوها، واللي تسببات حسبهم فوفاة الإطار التعليمي خالد أومربعا، اللي مات بفيروس كورونا المستجد.
وحسب بلاغ ليها، توصلات بيه "كود"، عبرات النقابة على "إدانتنا الصارخة لسياسة الإهمال اللي تمارسات ضد أومربعا داخل المستشفى، الشي اللي عجل بالوفاة ديالو"، كيف طالبات بفتح تحقيق فالموضوع.
وحسب النقابة، كان آخر ما كتب المتوفى، فالحساب ديالو على فيسبوك: "أنا في المستشفى.. راني مخنوق وخاصني الانعاش.. مكاتعرف شي واحد.. هاذ الناس خلاوني مليوح ما كاين لي كايسول فيا".
وأومربعا، اللي كان خدام فتارودانت، توفى الجمعة 21 غشت بعدما تدهورات حالتو الصحية فسبيطار سيدي حساين فورزازات.