كورونا ضربات مرجان فمراكش.. اكتشاف بؤرة ديال 100 مصاب والسلطات سداتو قبل مايزيدو يتفاقمو الحالات – تصاور

كشفات التحاليل المخبرية الدورية لفيروس كورونا المستجد اللي كتدار على الوحدات التجارية والصناعية فمدينة مراكش، إصابة ما يزيد عن 100 مستخدم فلي سوبير مارشي دمرجان.
وحسب مصادر محلية، فجوج دالأسواق دمرجان فمراكش ضرباتهم كورونا، وكيتعلق الأمر بمرجان طريق كازا اللي تصابو فيه 60، ومرجان طريق أكَادير اللي تقاسو فيه 40.
والسلطات المحلية انتقلات لعين المكان فالأسواق بجوج باش تآمر بإغلاقها، باش تحد من اتساع البؤرة الوبائية وانتقال العدوى للزبناء، وعلى ما تخرج نتائج مستخدمين خرين.
وديجا مراكش كتعرف ازمة صحية كبيرة بسبب ارتفاع معدل الإصابات بكورونا، واكتظاظ كبير فالسبيطارات وقلة الاطر الطبية والصحية، ومؤخرا تسربو صور ديال ناس ناعسين فالسبيطارات فالأرض وفالكولوارات.
ووزير الصحة مؤخرا انتقل لمراكش باش يعاين الوضع الصحي ديال المراكز الصحية ديالها، واتخذ مجموعة من الإجراءات من بينها توسيع الطاقة الاستعابية لمستشفى ابن طفيل وبناء مستشفى ميداني جديد فبنكَرير.