تقاسو بالفيروس فحمام بلدي.. تسجيل 18 إصابة بكورونا فبؤرة عائلية فعين إيطي فمراكش

عرفات "كود" من مصادر مطلعة بللي عدد الإصابات بفيروس كورونا المستجد فالبؤرة العائلية اللي تسجلات فدرب الفقيه، وتحديدا فمنطقة "عين إيطي" فمراكش وصل ل18 حالة مؤكدة، اليوم السبت، بعدما خرجو تحاليل إيجابية فصفوف بعض المخالطين للنساء المصابات.
وحسب المصادر نفسها ل"كود"، فمازال مجموعة من المخالطين ديال المصابين فهذ البؤرة كيتسناو النتائج ديالهم، فالوقت اللي خرجات أزيد من 20 تحليلة لمخالطين اخرين سلبية.
وحسب التحريات اللي داروها البوليس، انتقلات عدوى فيروس كورونا لمجموعة من العائلات فظرف وجيز، وتقاسو بالفيروس النساء فقط، بسباب حمام بلدي كان عند وحدة من المصابات فالدار، وكانو كيمشيو ليه العيالات باش يتحممو، وكيديرو فيه تجمعات، وهذشي اللي خلا أغلبهم يتصاب.
ووضعات السلطات المحلية درب الفقيه، التابع لمقاطعة "النخيل"، فالحجر الصحي، وهذي ثلث أيام باش طوقاتو بليباريير حتى تكتمل لائحة المخالطين دالمصابات، ويتدار ليهم الكشف.
وكيتلقاو المصابات العلاج ديالهم فسبيطارات الرازي وابن رشد، والحالة ديالهم مستقرة ومزيانة، كيف اكدات المصادر ل"كود".