بني ملال وصلاتها النوبة.. إغلاق القهاوي والحوانت بكري.. ولاصالات والحمامات غيتسدو بشكل نهائي

بني ملال حتى هي وصلاتها نوبة إغلاق الحوانت والقهاوي بكري من بعد رفع الحجر الصحي، ومن بعد ما عرفات المدينة تزايد كبير وملحوظ فعدد الحالات اليومية.
والي الجهة صدر قرار جديد باش المحلات التجارية تسد مع 8 دالليل، والقهاوي تتسد قبل منها مع الستة دالعشية، بشكل إجباري، واللي خالف هذ القرار ما يلوم غير راسو.
بالنسبة لمحلات الحلاقة والحمامات والقاعات الرياضية، فغادي تتسد فبني ملال بشكل كلي فهذ الفترة.
وحتى مداخل ومخارج المدينة غاتولي خاضعة للمراقبة.
وهذ القرار غادي يبقا ساري المفعول حتى لإشعار آخر.
والولات بداو يتحركو فجهات مختلفة من المملكة باش يديرو الزيار على بعض المدن اللي كتعرف ارتفاع فعدد الحالات، ويفرضو الإغلاق المبكر ديال المحلات والقهاوي، ومن اهم المدن اللي كان طالها هذ القرار قبل طنجة ومراكش وفاس