خوان كارلوص يقدر يكمل حياتو فالمغرب. وجهة من بين 5 دول وعلاقتو بمحمد السادس وقربو لبلادو يقدر يكون اختيارو النهائي

ملك اسبانيا الشرفي والشخصية اللي لعبات دور حاسم فديمقراطيتها خوان كارلوص يقدر يختار المغرب وجهة ليه بعد اعلانو مغادرتو بلادو على خلفية اتهامو بتلقي رشاوي من السعودية وفتح تحقيق فالموضوع. الملك الشرفي كان علن البارح فالعشية عن قرارو مغادرتو بلادو باش ما يضرش "الملكية" وفترة حكم ولدو الملك فيليبي السادس.
دابا فين غادي يقدر يمشي خوان كارلوص؟ المغرب وجهة محتملة من 5 وجهات هدرات عليها الصحافة . قناة "الثالثة" الاسبانية قالت فبرنامجها الصباحي هاد اليوم "إلإسبيخو بوبليكو" انه بالاضافة الى جمهورية الدومينيكان والمملكة العربية السعودية وسويسرا والبرتغال٫ كاين المغرب.
دابا الاحتمال اللي كاين هو البرتغال. كاينة العلاقة التاريخية وكاين الصحبة وكاين القرب من بلادو. طبعا هاد الشي موجود حتى فالمغرب. عندو علاقة مزيانة مع الملك محمد السادس.
دابا المدعي العام الاسباني غادي يقرر فقضية تلقيه رشاوي من ملوك السعودية وفتح حساب فسويسرا وتبعاتها كالتهرب الضريبي من التهم الموجه ليه. القضاء فهاد الشهر غادي يحسم فيها