رسميا: الحجر التدريجي بدا فالعيون. الحواجز الأمنية تحيدو . ومواطن ل"كود": الناس فالصحرا كانت واعية بخطورة الوباء – تصاور

خففت ولاية جهة العيون الساقية الحمراء، رسميا في الساعات الأولى من اليوم الخميس، إجراءات الحجر الصحي على مستوى مدينة العيون وفقا للمرسوم المصادق عليه فيه هذا الصدد، وبلاغ وزارة الداخلية ووزارة الصحة.
والي جهة العيون الساقية الحمراء، عبد السلام بكرات مع والي أمن العيون حسن أبو الذهب وعمدة المدينة حمدي ولد الرشيد واخرين كانو فاول دقائق من 11 يونيو 2020 باش يشرفو على حالة التخفيف من تدابير الحجر الصحي. اول حاجة دارت هي حيدو شي حواجز فالشوارع الرئيسية باش يسهلو تنقل المواطنين فالمدينة.
بيكرات قال باللي خاص الجهة تحافظ على هاد التصنيف اي منطقة رقم 1 وطلب الاستمرار فارتداء لكمايم والتشديد علي التباعد الاجتماعي وامور اخرى عندها علاقة بالنظافة. واكد ان التغلب على الوباء خاصو التحلي بالمسؤولية الوطنية والاخلاقية.
ولاية لعيون غادية توضح اكثر هاد النهار التدابير لخرى اللي عندها علاقة بالتخفيف من إجراءات الحجر الصحي٬ خاصة تنقل المواطنين داخل الجهة ووقتاش يفتحو ويسدو التجار والاعمال الحرة اللي مسموح بيها.
وخلال رفع الحجر التدريجي، احد المواطنين بغى يوصل رسالة من خلال ميكرو "كود": حيث قال بأن ساكنة الصحرا تفاعلات بشكل إيجابي مع النداءات اللي طلقتها السلطات المحلية والأمنية، وعملت على الالتزام بالإجراءات الوقائية وتجنب التجمهر والتجمعات التي كانت ولاتزال تشكل خطورة على المواطنين، وزاد صرح بأن هاد الرفع هو ثمرة للوعي لي بداتو ساكنة جهة العيون والأقاليم الجنوبية كاملة.