الكيران رجعو. نقابي بالنقل الطرقي ل"كود": لحد الساعة ماعندنا حتى شي تعليمات.. والبدية غاتكون مع المنطقة 1.. وممنوع السفر بين الجهات اللي فيها كورونا

كشف عبد العالي خفي، الكاتب الوطني لقطاع النقل الطرقي، تمثيلية السائقين، ونائب الأمين العام للمركزية النقابية للجان العمالية المغربية، أن أرباب حافلات النقل الطرقي للمسافرين ما زال ماجاهم حتى شي قرار أو تعليمات من وزارة النقل أو المفتشين الجهويين ديالهم لاعطاء انطلاقة لاشتغال الحافلات، كيفما كيروج.
وقال خفي، فتصريحو ل"كود"، بللي غيمكن يكون شي تحرك مستقبلا فالمنطقة 1 وبين المدن ديالها، تماما كيف شار لهذشي رئيس الحكومة، سعد الدين العثماني، اليوم فالبرلمان، لكن يستحيل الكيران يرجعو يشتغلو فالمنطقة جوج اللي كتعرف أكبر المحطات الطرقية فالمغرب، أو يكون تنقل بين الجهات اللي كتعرف نسبة إصابات كثيرة بالفيروس.
أما بالنسبة لاستئناف الحافلات العمل غدا، كيفما تداولات تقارير إعلامية، كيقول خفي: "لا أعتقد، حيت مازال ما كاينة ترتيبات وقائية كتتعلق بالصعود للحافلات وولوج المحطات، وفهذ الحالة كيصعاب الاستئناف، وماحطات كلشي مغلق، وماكاينة حتى تعليمات جديدة".