ولاو 8 فالطوطال.. 3 إصابات جديدة بفيروس كورونا عند المغاربة اللي كانو حاصلين فالجزائر

عرفات "كود" من مصادرها الخاصة أن لبارح بالليل خرجات نتائج تحاليل فيروس كورونا المستجد إيجابية ل3 أشخاص من الفوج الثاني دالمغاربة اللي رجعو من الجزائر، ووصل عدد المصابين بكورونا من مغاربة لجزائر ل8 أشخاص فالمجموع.
وحسب المصادر نفسها، فالقاسم المشترك بين المصابين ال8 هو أنهم كانو فمدينة بلعباس، وشي وحدين فيهم كيعرفو بعضياتهم، وبالتالي فالعدوى انتقلات ليهم عن طريق الاختلاط.
ولحد الساعة، خرجات نتائج 97 تحليلة للفوج الثاني من مغاربة الجزائر، ومازال نتائج 203 باقي ما بانت لحد الآن.
وللإشارة، ولبارح الخميس رجع الفوج الثاني من المغاربة اللي كانو حاصلين فالجزائر، وكيبلغ العدد ديالهم 300 شخص فالمجموع، ودابا راهم كيديرو الحجر الصحي فواحد من فنادق مدينة السعيدية، مع الفوج اللول اللي كانو جاو قبل أسبوع واللي مابقى ليهم والو ويساليو الحجر الصحي.
وكانت خرجات نتائج تحاليل الفيروس للفوج اللول سلبية، وبالتالي ماكان حتى شيحد فيهم مقيوس بكورونا.