المغنية عبير العابد قرعات شعرها وأكدات: شحال من وحدة تعقدات أو دارت الزيف باش تغطيه.. وما قدراتش تقبل راسها قرعة حيت الناس غادي يضحكوا عليها.. البنات سمعوني مزيان سر جمالك هو عقلك و كيانك و ذكائك -تدوينة

قدرات المغنية عبير العابد تخلق الحدث البارح على انستكَرام بعدما حطات تصويرة مقرعة فيها شعرها ودوزات من خلال هاد العملية لي دارت ميساج زوين بزاف لكَاع النساء في العالم لي كذبو عليهم يوم من الأيام وقالو ليهم الا معندكش الشعر راكم ماشي مرا.
وكتبات عبير على صورتها :"شحال من وحدة تعقدات أو دارت الزيف باش تغطي أو باروكا، غير حيت شعرها كيطيح، أو حرش، أو مرضات بالسرطان و ما قدراتش تقبل راسها قرعة حيت الناس غادي يضحكوا عليها .. البنات سمعوني مزيان، سر جمالك هو عقلك، و كيانك، و ذكائك، و مستواك الفكري و أخلاقك، و فلوسك وعملك، وقلبك و نيتك وأهم حاجة ابتسامتك و ثقتك بنفسك".
وأضافت المغربية لي تشهرات بعد مشاركتها في مسابقة arab's got talent :"هادي هي قيمتك، ماشي شعرك، أو جسمك .. خليك قوية رغم كلام الناس لي ما غادي يفيدك فوالو.. من الآن فصاعدا، سمعي لقلبك، وديري داكشي لي أنت مقتانعة به، مدام ما كيمس الحرية ديال حتى شئ واحد ولا كيخدش الحياء، أما بالنسبة لداك الناس لي غادي يضحكو عليك ما تديهاش فيهم، واش كاين شي إنسان عاقل،واعي و عندو قيمة فالمجتمع،كيعطي رأيه فالناس بلا ما حتى واحد يطلب منه؟؟!!! طبعًا لا، هادوك كلهم ناس حياتهم فارغة عليها كيهتمو بمشاكل و حياة الناس .. آخر كلمة أنت فتاة إذا أنت مركز الكون بشعرك أو بلاش".
بزاف ديال المشاهير والمتتبعين تفاعلو مع منشور عبير، لي فيه ميساج قوي، وتفكير زوين، وقليل فين كنشوفو هادشي في السوشل ميديا المغربي.