مخالطي مصابي كورونا فأسواق السلام دارولهم التيست وعزلوهم فأوطيل فكَيليز

عرفات "كود" من مصادر محلية بللي مخالطي الحالات الثلاث اللي تصابو بفيروس كورونا المستجد فأسواق السلام فمراكش تم إخضاعهم للحجر الصحي، اليوم الأربعاء، ففندق بحي كَيليز حدا المركز التجاري اللي خدامين فيه، من بعد ما تدارو ليهم التحاليل.
وحسب نفس المصادر، فمازال كاينين موظفين ماخضعوش لهذ للكشف على فيروس كورونا، لكن بمجرد ما يبانو نتائج اللي دارو التحاليل، غادي يتدارو التحاليل لباقي الموظفين فالمركز التجاري، كيف واعدوهم.
وغادي تبان نتائج تحليلات المخالطين اليوم، وغيمكن تكشف على إصابات جديدة بالفيروس.
وكانت أسواق السلام فكَيليز سدات هذي أيام بعدما تسجلات فيها 3 حالات مؤكدة دالإصابة بكورونا.
وللإشارة، حتى أسواق السلام فمدينة قنيطرة تسدات هذي دابا أسبوع، من بعد ما تبثات الإصابة ديال عامل فيه، بينما الموظفين لوخرين خرجو نتائجهم سلبية.