ردات إدارة المستشفى الجامعي محمد السادس فمراكش على فيديو بنت كتغوت فوسط السبيطار، كتتهم فيه هي والشخص اللي صورها الطاقم الصحي بالتقصير فحقها، وكتبان حالتها متدهورة بزاف وكتكحب بالجهد بحال إلى كانت مصابة بفيروس كورونا المستجد، وحتى شي حد ما جا عندها أو شافها مالها. إدارت المستشفى وضحات، فبلاغ ليها حصلات عليه "كود"، بللي تم استقبال المعنية نهار 4 ماي فمصحة المستعجلات على الساعة السابعة وعشرين دقيقة بخلية "كوفيد 19" من طرف الفريق الطبي المداوم بنفس المصحة، وتم استبعاد إصابتها بكورونا، وهذشي بعدما تم اتباع البروطوكول الموصى به من طرف وزارة الصحة. وكتقول إدارة المستشفى، فالبلاغ نفسو، بللي السيدة تلقات العلاجات الضرورية، وتم وضعها فمصحة المستعجلات اللي مافيهاش مرضى "كوفيد 19′′، ومن بعد استقرار حالتها الصحية وخرجات من السبيطار فنفس النهار، قبل ما يكتب ليها الطبيب المختص الدوا. وكتعلن إدارة المستشفى بللي كتحتفظ بحقها فمتابعة اللي روج الفيديو بسباب "حقائق مغلوطة" على حالة السيدة، وغاتعلم النيابة العامة باش تتخد التدابير الضرورية فهذ الباب.