مْوْلاَتْ الفيلم من فلوسها وبإمكانيات بسيطة.. سناء عكرود ل"كود": المركز السينمائي ماعطاش "ميوبيا" الدعم بسبب تحفظو على بعض المضامين.. وتقدمنا بطلب الدعم 3 مرات وجوج لجان رفضو الطلبات

تأسفات سناء عكرود، الممثلة والمخرجة المغربية، لعدم حصول الفيلم ديالها الجديد "ميوبيا" على الدعم من طرف المركز السينمائي المغربي، وأكدات بللي هذشي خلا فريق العمل مايكونش حر بشكل كبير فالإمكانيات التقنية باش يعطي كثر.
ووضحات عكرود، فحوار ليها مع "كود" غيتنشر من بعد، واللي كان الأول ليها بعد إنتاج الفيلم اللي مازال ما تعرض، بللي الفيلم تقدم بطلب الدعم ثلاث مرات للمركز السينمائي المغربي وتم الرفض ديالو.
وماقدراتش عكرود تحدد السبب الرئيسي من رفض دعم الفيلم، حيت تدارسو ملف الفيلم جوج لجان تعاقبات عليه، إلا أن الملاحظات اللي وجهو ليها كانت كتتعلق بصياغة بعض المضامين وشي لقطات، وكانت كتعاود هذشي فكل مرة وكيترفض الطلب.
وقالت عكرود بللي هذا الكم الهائل ديال الرفض ما منعهاش من إنتاج الفيلم وإخراجو للوجود، والحاجة اللي حفزاتها أكثر هي البطلة فاطمة، اللي شخصات الدور ديالها، واللي حسات بللي إلى تخلات عليها وحطاتها فمجر وسدات عليها بحال ألى دفنات إنسان حي.
وبالنسبة لإنتاج الفيلم، أكدات عكرود انه كان من مالها الخاص وبإمكانيات بسيطة، وهذشي اللي خلاها تتعطل فإخراجو، فغياب المؤثرات الصوتية والفنية اللي ممكن تساعد الفيلم كثر وتخلي اللي خدامين عليه يديروه براحة أكثر وفظروف أحسن.