فأول خروج إعلامي ليها بعد ضجة فيلم "ميوبيا"، سناء عكرود كتشرح ل"كود" علاش البطلة قالت "الله نسى مادازش على القرية ديانا": فاطم كتقصد بالله اللي نساها زعما جنودو اللي نساوها أو هملو حقها فالوجود كأي إنسان حر كتعاتب بكلامها الله لأنه كل ما لديها

"كنحس بحال إلى الله نسى مادازش على القرية ديالنا"، هذ العبارة جبدات على سناء عكرود، الممثلة والمخرجة المغربية، بزاف ديال الانتقادات، بعد صدورها على لسان بطلة فيلمها الجديد "ميوبيا" اللي مازال ماتعرض فالقاعات السينيمائية، لكنه عانى من التسريب وتم تداولو بشكل كبير على مواقع التواصل الاجتماعي.
فأول خروج إعلامي لعكرود، المخرجة وكاتبة السيناريو ومؤدية دور "فاطم" بطلة الفيلم، وضحات سبب استعمال هذ العبارة والمغزى ديالها بالقول: "البطلة فاطم اللي تلفظات بهذ الهضرة كتقصد بالله اللي نساها زعما جنودو اللي نساوها أو هملو حقها فالوجود كأي إنسان حر، كتعاتب بكلامها الله لأنه وملاذها وكل ما لديها، بالنسبة ليا عمري ما شفت شي طريقة في التعبير عن حب لله أكثر رقة من طريقة فاطم ".
وفحديثها على البطلة فاطم، قالت عكرود، فحوار ليها مع "كود" غيتنشر من بعد: "هي بسيطة التفكير، وفي نفس الوقت شاملة ومتسامحة مع الآخر، لأن الوجود بالنسبة ليها كيتلخص في الحب والحرية والحق، والله هو القوة العليا بالنسبة ليها وهو إله الجميع، بحال اليهودي بحال المسلم بحال المسيحي…".
وفسؤال "كود" عكرود واش فكرات فمدى تقبل الجمهور لمثل هذ التصورات والتفاعل معاها بشكل إيجابي، جاوبات: "ملي كنخلق شخصية أو عالم ما، ماكنسولش واش المشاهد مستعد ليه، ما دام أنا تكلمت عليه إلا والناس حتى هما قادرين عليه، ومستعدين يتفاعلوا معاه، وإن حدث وعنفتهم بشكل ما، بعبارة ما أو مشهد، فهذ التعنيف مقصود، من أجل إحداث صدمة فنفسيتهم، غير ما تكونش مبتذلة".
وكتقول عكرود بللي الهدف الأساسي من الفيلم هو خلق شعور بالقلق والخوف عند المتلقي، اللي يخليه يفكر فوضعية فاطم، على اعتبار أن العالم كلو فيه العديد من الناس بحالها.