بعدما ظهرات عليه أعراض الإصابة.. المصور الصحافي رزقو غايدير تحاليل كورونا وكيصرح ل"كود": صحتي بيخير

المصور الصحافي فجريدة أخبار اليوم، عبد المجيد رزقو، فهذ الأثناء من ليلة الخميس كيتسنى نوبتو باش يجري التحاليل على فيروس كورونا المستجد، بعد ما ظهرات عليه أعراض الإصابة.
رزقو قال، فتصريح ل"كود"، بللي مشا فأول المطاف للمستعجلات، ومن بعد سافطوه للجناح المخصص بكورونا فسبيطار سيدي مومن للقرب، باش ياخدو عينات للتحاليل اللي غايسيفطوها للمستشفى الجامعي أو معهد باستور.
وقال رزقو، بللي جاوه أعراض ديال الإصابة، بحال الكحة والسخانة وضيق التنفس، وهذشي اللي خلاه يطلب يسارع بإراء التحاليل باش يتأكد من عدم إصابتو بالفيروس أو لا، لكن فنفس الوقت أكد بللي صحتو مزيانة على كل حال.
وكان الصحافي بجريدة أخبار اليوم، منير أبو المعالي، علن فالحساب ديالو على موقع التواصل الاجتماعي فيسبوك على ظهور أعراض فيروس كورونا على رزقو، وتوجهو للمستعجلات برجليه بعدما ما جاوبو حد فالأرقام المخصصة للإعلان على الإصابات المشتبه فيها بالفيروس.