الضسارة.. زهير زائر واش كيصحاب راسو زوين لدرجة يستهزأ بمتتبعة ديالو لأنها "مازويناش"؟

الفن، كيكون معاه شلا اخلاق ووعي، والفنان الحقيقي هو انسان مخلق وواعي، غير هو فبعض الحالات شي اشخاص اللي كيتطفلو على الفن كيبينو واحد النيفو طايح.
لبارح الكوميدي زهير زائر دار لايف على حسابو في أنستكَرام، وكان كيطلع فيه الضيوف من المتتبعين. وفي واحد اللحظة قال لوحدة من المتتبعين فاش شافها في الكاميرا طفي طفي الضو زعما راك خايبة.
والأكثر من هذا زهير طلع معاه الميكاب أرتيست دينا أقصبي في اللايف، وكتب على اللايف من بعد "اوا هذا لايف تاريخي"، ما عرفناش اشنو الفرق بينها وبين البنت العادية لي متتبعة ديالو زعما ومن جمهورو.
وواش من الأخلاقي نعيبو على مظهر إنسان، خاصة فاش كنكونو شخصية عامة، ومن المفروض نعطيو مثال زوين للمتتبعين والجمهور.