بالصور والفيديو: جسر جوي من مراكش للندن لميريكانيين حصلو فالمغرب. نوضوها على السفير لقاو ليهم حل. دابا فمطار مراكش طيارات غادية ترجعهم واخا تكون فيهم "كورونا فيروس"

ميريكان دارت جسر جوي باش تدي دياولها هاد الصباح من مطار مراكش
Publiée par GOUD sur Vendredi 20 mars 2020
قررت السفارة الاميريكية بالرباط نقل مواطنيها اللي حصلو فالمغرب وللي حوالي 3 الاف اميركي. الاجواء الجوية المغربية غادية تفتح ليهم. وكان فوقت قياسي اكثر من 7500 امريكي وقعو عريضة انتاقدو سفيرها. وفق مصدر "كود" البارح مع "الجوج الصباح توصلنا برسالة باللي كاين رحلات من مراكش. كلشي نزل فالصباح" يحكي احدهم ل"كود".
المطار كيف كتبين الصور اللي تنشرها "كود" مع الموضوع٬ عامر بزاف وما فيهش غير الاميركيين. كاينين ناس كثار حاصلين.
امريكا تفقات مع "بريتيش اير واي" باش تخدم فهاد الجسر الجوي "دابا من لحداش ونص دالصباح على راس كل ساعة كاينة طيارة. ايلي ما كفاش اليوم غاديين يكملو غدا حتى يمشيو كاع الاميركيين" يشرح مصدر "كود" اللي غادي يمشي فرحلة لطناش ونص التوقيت المغربي.
دابا الرحلة غادية تكون من مراكش للندن ومن لندن كاينين رحلات لنيويورك وسياتل ولوس انجلس وشيكاغو وواشنطن وسان فرانسيسكو وبوسطن. الدولة الاميركية حاضرة فالمطار باش تسهل امور مواطنيها.
بخصوص واش كتكون مراقبة الحرارة باش يشوفوواش كاينين شي امريكيين فيهم كورونا فيروس قال مصدر "كود" "ما كاين والو. خاص كلشي يدخل لامريكا ومن بعد باش يوصلو يراقبو ويشوفو شكون فيه ويتصرفو.
كل واحد غادية تطلع عليه الرحلة بحالو بحال كاع الميريكانيين ب1484 دولار. ما غادينش يخلصوها حتى يوصلو. غير كيوقعو على التزام وكياخذو التذكرة.