قضية الشيفور لي بغا يقتل تلاميذ فمراكش.. كوثر بامحمد: عنداك يشدوه البوليس وتخرج مو تقول ولدي غا بوهالي

الفيديو الصادم ديال واحد سيد كيكسيري بطوموبيل وكيحاول يدخل في الدراري ديال المدرسة باش يقتلهم خلف ردود فعل صادمة.
الكوميدية كوثر بامحمد شاركات الفيديو في صفحتها على انستگرام لي فيها 3 مليون متابع، وتساءلات على العقوبة لي غادي يتم تقريرها ضد هاد الشخص. واضافت “هادشي الا مخرجاتش مو وقالت ولدي غا بوهالي”.
وباش متجبدش النحل على راسها قالت “كَاع الأمهات مايبغيوش ولادهم يتحطو في هاد المواقف، ولكن كان عليه يفكر 10 آلاف مرة قبل ما يدير هادشي”.
الفيديو تصور في مراكش، وحسب التعاليق لي وصلو لكوثر بامو أن مول الطوموبيل ضارب مع شي راجل كبير والتلاميذ مرضاوش بالحكَرة وحاولو يمنعوه باش مايهربش، ساعة هو باش يهرب كان غادي يقتل فياج ديال بنادم.