بعد تفشي “كورونا”.. ها نصائح وزارة الصحة للمغاربة اللي مسافرين للشينوا وكوريا والطاليان

قدمات وزارة الصحة، من خلال ملصق وضعاتو فموقعها الإلكتروني، نصائح للمسافرين المغاربة اللي متوجهين للمناطق اللي كتعرف انتشارا فيروس “كورونا” المستجد (كوفيد 19) بشكل كبير.
وطلبات الوزارة من المسافرين يأجلو السفر ديالهم للدول اللي منتشر فيها الفيروس إلا كانت رحلاتهم غير ضرورية، كيفما طلبات منهم إلى كانوا مضطرين يسافرو بالالتزام بشروط الوقاية والنظافة، وكذلك احترام التعليمات الصادرة من السلطات الصحية ديال البلاد اللي غيمشيو ليها.
ونصحات وزارة الصحة المسافرين المغاربة بتجنب الأماكن اللي فيها تجمعات، وتجنب الاحتكاك أو الاتصال المباشر مع الأشخاص اللي فيهم السخانة والرواح وكيكحو بزاف.
وبالنسبة لقواعد النظافة اللي نصحات بيها الوزارة المسافرين، فكتتمثل فغسل اليدين مزيان بالما والصابون وبشكل متكرر، وإلا استعمال المعقم المضاد للميكروبات، بالإضافة لتجنب أنهم يقيسو نيفهم وفمهم في حالة عدم غسل اليد، وتغطية الفم والنيف بمنديل فاش يجيو يعطسو أو يكحو، وديما خصهوم يحرصوا على لبس الكمامات الطبية.
هذشي وطلبات الوزارة من المسافرين يتجنبو الذهاب للكوريات والبلايص اللي كتكون فيها الحيوانات أو مخلفات الحيوانات والباطوار، ويتجنبو يقيسو الحيوانات صوا حية ولا ميتة، وماياكلوش المنتجات الحيوانية اللي ماطايباش مزيان.
ووجبات الوزارة على المسافرين باش يراقبوا الحالة الصحية ديالهم خلال الإقامة، ويستشرو الطبيب إلى بانت عليهم أعراض الإصابة بالفيروس وجاتهوم السخانة أو أي أعراض تنفسية أخرى، ويسارعوا بإشعار طاقم الطائرة إلى بانت عليهم هذ الأعراض فرحلة العودة، ويتبعو تعليماتهم.
ووضعات الوزارة رهن إشارة المسافرين الرقم الاقتصادي 0801004747 من أجل الاستفسار.