بالفيديو. واش كاينين ليكلان فالمنتخب؟ بونو ل”كود”: ما كايناش شي فرقة ما فيهاش ليكلان ولكن فالتيران كلنا مع المنتخب والرباح هدفنا

استغرب ياسين بونو حارس الاسود حارس نادي اشبيلية “اف سي” في حوار مع “كود” ما يثار على “ليكلان” فالمنتخب. الحارس قال ل”كود” باللي عندو علاقة مزيانة فالمنتخب مع اللعابة ومع الجمهور ومع الصطاف.
واكد باللي هادي 8 او 9 سنين و”انا مع المنتخب” وباللي “ليكلان كاينين فكاع الفرق ماشي غير عندنا بوحدنا” وباللي اللي خاص من اللعاب المحترف اللي كيلبس قميص المنتخب هو “كيعرف كيفاش يتعامل مع هاد الشي”
بونو عاود اكد على ان هاد الشي ماشي خصوصية مغربية حقاش “كاينين شي لعابة عندهم ليزافينيتي” مع لعابة خراين”.
بونو قال باللي هاد الشي ما عندوش علاقة بنتائج المنتخب “الواحد خاصو يعرف ان الماتشات هما الماتشات. يعني الكورة. خاصك تعرف ان اللي كيجمعك مع اللعابة فالتيران هي المنتخب =الدرابو= وهي الكورة اي الرباح”