لمغاربة يمكن بوحدهم فالمونديال اللي جاو عائلاتهم معاهم. هادي مزيان غير ما حمروش ليهم لوجه

المنتخب المغربي يمكن هو الوحيد فهاد المونديال اللي جا لروسيا وجابت ليه الجامعة الملكية المغربية لكرة القدم عائلات اللعابة. اللعابة اللي كاينين فاوربا او غيرها جابت ليهم الجامعة اسرهم. هادي مزيانة بزاف. كاين اللي انتقدها وكاين اللي اعتابر هاد الشي خسران فلوس الدولة على امور ما كتعلقش بالمنتخب. هادا نقاش فيه قنعني نقنعك.
فلوس الدولة اللا حقاش باش كيتأهل اي منتخب فالمونديال كياخد منحة مزيانة والاتحاد الافريقي حتى هو كيدعم. غير هو راه 19 لعاب مغربي من اصل 23 اللي كاينين فالمونديال اصلا ما تزادوش فالمغرب وكاين اللي مشى صغير. بمعنى ان قبولهم المشاركة فالمنتخب المغربي لكرة القدم على دعوات للمشاركة فمنتخبات لبلاد اللي عندهم الجنسية بحال هولندا وبلجيكا على سبيل المثال راه ما جاش غير هاكاك. العائلة فتقريبا كاع الحالات هي اللي قنعات ولادها باش يختارو المغرب. هادا رد جميل لهاد العائلات٬ ثم رسالة لمغاربة العالم كذلك.
الكورة كتسحر وتقدر تساهم فايجاد حلول لمشاكل كثيرة عميقة مرتبطة بهوية مغاربة العالم.
هاد الشي اللي دار مزيان غير اللعابة ما حمروش وجه عائلاتهم. كاين اللي تقاتل وكاين للي دوز الماتش مخلوع.
المهم العائلات غادية تشوف الماتش الثاني ويمكن تطفرو المغرب مع برتغال رونالدو