بسبب الضبابة.. رموك دخل ف7 ديال الطوموبيلات فلوطوروت بين كازا والمحمدية

هذ الصباح(اليوم الثلاثاء)، وقعات كسيدة خايبة فلوطوروت بين كازا والمحمدية، من بعد ما دخل رموك ف7 ديال الطوموبيلات.
وحسب مصادر “كود”، فالناس اللي تقاسو فالكسيدة كلهم بصحة جيدة، باستناء واحد فيهم اللي تصاب فذراعو إصابة خفيفة، لكن فالمقابل تسببات الكسيدة فأضرار مادية كبيرة على مستوى مجموعة من الطوموبيلات.
ووقع هذشي بسبب الضبابة الكثيفة اللي كانت كتحجب الرؤية على السائقين، بالإضافة لعدم مراعاة الظروف الجوية وعدم احترامهم لمسافة الأمان.
وجاو السلطات المعنية باش يحققو فظروف وملابسات الحادث، ويحاولو يأمنو حركة السير فالطريق اللي تقطعات، بينما عمرو المتضرين المعاينات الودية، وتكلفو صحاب الديباناج باش يخويو الطريق.