مشكل فاخر غادي وكيتعقد.. المنخرطون طلبوا من سيدينو يجري عليه ولو يخلصو من جيبو

مشكل امحمد فاخر، مدرب حسنية أكادير غادي وكيكبر، بسباب النتائج السلبية، اللي حصدها الفريق السوسي منذ إقالة المدرب الأرجنتيني ميگيل گاموندي.
الحبيب سيدينو، رئيس حسنية أكادير اجتمع بالمنخرطين البارح السبت، وناقش معهم ما يجري بالفريق، والحلول اللي يمكن تخرجو من دوامة النتائج الكارثية.
المنخرطون حملوا المسؤولية الكاملة للرئيس سيدينو، لحقاش هو اللي جاب المدرب فاخر وهو اللي كايقرر بوحدو، وبالتالي هو سبب هاد النتائج الكارثية.
المنخرطون رفضوا استمرار فاخر مدربا الحسنية، وطالبوا من الحبيب سيدينو يجري عليه ويفك معاه جرا، ولو اقتضى الحال يخلصو من جيبو، المهم ما يبقاش فالفرقة.
وحسب مصدر “كود”، فأن رئيس الحسنية أكد أنه غادي يدرس هاد الطلب قبل ما يقرر فيه، بعد الماتش ديال الكونفدرالية الإفريقية لكرة القدم.