بعدما دوات على انتحار وئام الدحماني.. الشطاحة مايا كشفات حقائق جديدة فقضية حمزة مون بيبي

الراقصة مريم المشهورة بمايا دارت لايف جديد البارح الاثنين في انستكَرام وكشفات حقائق جديدة في قضية حمزة مون بيبي، وهادشي بعدما قالت في وقت سابق أن الممثلة والمنشطة وئام الدحماني واقيلة انتحرت حيت كانو صحاب الكونط شادين عليها فيديوهات جنسية.
مايا في كل مرة كتخرج وتدوي قدام 3 الاف واحد مباشرة، والبارح نصبات راسها مدافعة ومحامية ديال سكينة كَلامور لي مشدودة في الحبس هادي 3 اشهر وقالت أنها مظلومة.
وقالت “سكينة غير مريطة في القضية. هي ظريفة وماشي انسانة خايبة. ودابة ضرني راسي بغيت نعرف الملف ديال بصح شنو فيه”. وأكدات في نفس الوقت أنها كانت حاضرة ملي ناض الصداع لأول مرة مع المصممة سلطانة لي كان الكونط متخصص فالتشهير بها.
مايا في المقابل قالت أن الكفالة لي خلصات باطمة كتبين أنها غارقة ومتورطة في القضية، وبغات كاع المتورطين يدخلو للحبس أو كلهم يخرجو، في اشارة أن باطمة وختها ابتسام متابعات في حالة سراح.
هاد التصريحات لي كتقول مايا خطيرين وخاص النيابة العامة تستمتع ليها بشكل رسمي عوض تبقى داوية في موضوع مازال بين يد القضاء فمواقع التواصل.