أغنية جديدة ديال “الكَناوي” سميتها “الحشايشي” شادة الطوندونس فاليوتوب المغربي واخا هو فالحبس- فيديو

الرابور “الكَناوي” واحد من روابا لي غناو “عاش الشعب” المثيرة للجدل، دار أغنية جديدة تحطات في اليوتوب واخا هو في الحبس حاليا من أجل تهم كتعلق ب"سب وقذف موظفين عموميين أثناء مزاولة مهامهم والإهانة والقذف في حق هيئة منظمة".
الأغنية بعنوان “حشايشي” ولي بدات بملاحظة بالبند العريض “هاد الأغنية مكتشجعش على الحشيش ولكن كتعبر على وضعية الملايين من الشباب المغاربة”، ودوا فيها على كيفاش تبلا وكيفاش ولا كيكمي الحشيش.
الفيديو المدة ديالو 5 ديال الدقايق وهو عبارة عن فيديوهات مع صحابو فالبحر وفالطونوبيل دارو عليه صوتو.
في نهار ضرب الفيديو تقريبا مليون مشاهدة، وشد البلاصة الأولى في الأغاني الأكثر مشاهدة في اليوتوب المغربي.
وقال سعيد كشون، محامي الرابور في تصريح البارح ل “كود”، ان "قضية الكناوي تدخل في نطاق حرية التعبير لكن الإدارة تراها بأنها لحقها حيف فيما نسب إليها من قبل الرابور الكناوي".
وقررات المحكمة الابتدائية بسلا، تأجيل المحاكمة ديالو إلى 25 من هاد الشهر، بطلب تقدم به الدفاع المدني (المديرية العامة للأمن الوطني) باش تطالع على الملف حيث نصبت مديرية الحموشي نفسها طرف مدني في الملف.