هجوم بقنبلة على دار ساكنين فيها شيبانيين مغاربة فهولندا

واش اعتداء عنصري ولا جريمة بسبب الحشيش…؟ هذا هو السؤال اللي مازال ما لقى ليه البوليس الهولندي جواب رغم مرور ساعات على الاعتداء اللي داروه مجهولين بإلقاء قنبلة داخل دار ساكنين فيها جوج شيبانيين مغاربة بمقاطعة اوتريخت.
الهجوم واخا ماطاحتش فيه الروح إلا أنه تسبب في حالة ذعر كبيرة فساكني المنزل خصوصا و بين سكان الحي اللي وقع فيه عموما، كما انه تسبب في إحداث أضرار كبيرة في المنزل.
و دابا البوليس المكلف بلونكيط راه تابع جوج طرقان لعله يوصل للفاعلين: الطريق الاولى هي امكانية يكون الاعتداء عندو طابع عنصرية و هاذ الفرضية عندها بروفايلات لمشتبه فيهم افتراضيين، و الطريق الثانية و هي الاكثر ترجيحا تقول بأن الهجوم ما هو إلا حلقة جديدة من حلقات حروب عصابات المخدرات اللي شاعلة منذ مدة فهولندا، و ما يرجح هاذ الفرضية هو نشاط واحد من اولاد الشيبانيين الضحايا ضمن عصابات الاتجار في المخدرات.