الديربي بدا عند الرجا…الزيات للعابتو: ربحو عندكم 4 المليون ». الغيابات مبرزطة الحمرا

الرجاء البيضاوي بدا كيستعد للديربي، لي غادي يجمعو بغريمه التقليدي الوداد البيضاء نهار السبت جاي بمركب محمد الخامس في الدار البيضاء ف السبعة ديال العشية، برسم ثمن نهائي كأس محمد السادس للأندية العربية.
وكشف مصدر مقرب ل”كود”، أن جواد الزيات، رئيس الرجاء البيضاوي اجتمع مع اللعابة بمركب الوازيس البارح الجمعة ووعدهم بمنحة مغرية تقدر ب40 الف درهم إلا ربحوا الديربي، لحقاش عوال على هاد المسابقة باش يمشي فيها بعيد.
الزيات طالب اللعابة باش يبدلوا كل ما ف جهدهم من أجل تحقيق الفوز، وبالتالي التصالح مع جماهيره، خصوصا بعد الأداء المتواضع للفريق ف ماتش ديال رجاء بني ملال نهار الخميس لي فات.
أما الوداد البيضاوي، فهو مبرزط مع الإصابات لي كيعاني من بعض اللعابة الأساسيين بحال بديع أووك وأيمن الحسنوني، لي غادي يكونوا غائبين على الديربي بحالهم بحال محمد الناهيري وعبد اللطيف نصير، الذي سيغيب بدوره بسبب عقوبة التوقيف، بعدما تطرد ف الماتش ديال المريخ السوداني.
الوداد غادي يكون محروم من لعابة اساسين ومع ذلك سيخوض الديربي من أجل الفوز على غريمه التقليدي.
السلطات الأمنية بدأت الإجراءات ديال التذاكر وعوالة تسهر عليها بنفسها باش تنظم عملية البيع وتمنع الرجاء باش ما يطبعش أكثر من الطاقة الاستيعابية للملعب.