إقبال كبير على “لي بيي” ديال كلاسيكو الوداد والجيش…35 ألف تذكرة تباعت

كشفت مصادر ودادية موثوقة، أن “لي بيي” ديال الماتش الكلاسيكو، لي غايجمع الوداد البيضاوي والجيش الملكي اليوم الثلاثاء كتعرف إقبال كبير من طرف الجمهور الودادي
هاد المصادر أكدت أن 30 ألف تذكرة تباعت البارح، واليوم في الصباح وصلات ل35 الف، ويقدر العدد يرتفع هاد العشية.
بزاف ديال الجماهير باغا تحضر الماتش ديال اليوم بملعب مركب محمد الخامس في الدار البيضاء فالثمتية ديال العشية. حتا الجمهور العسكري غادي يكون حاضر، بعدما حصل على 3 0لاف تذكرة.
لا الوداد ولا الجيش غادي يلعبو باللعابة دياولهم الأساسيين، لحقاش الماتش صعيب وكل واحد فيهم باغي يتأهل لثمن نهائي كأس العرش.
عبد الرحيم طاليب مازال كيفكر واش غادي يلعب عماد الراحولي ولا ما يلعبوش، لأنه ما كانش فالماتش الأولى ضد المغرب التطواني.
الوداد غادي يلعب بلاعبيه الأساسيين حتا هو، بمن فيهم إسماعيل الحداد، لي تضرب مع المنتخب المحلي فالماتش ديالو مع الجزائر.
كلاسيكو الوداد والجيش الملكي غادي يعرف تعزيزات أمنية مكثفة، باش ما يكونش الشغب بعدما يسالي.