من نهار تشد في قضايا الاغتصاب.. أمير الرواني قلب على سعد لمجرد وعبد الرفيع خدا بلاصتو

المخرج أمير الرواني قطع علاقتو مع المغني سعد لمجرد من نهار تشد في قضية الاغتصاب الأولى في فرانسا ومن تما، كل واحد شد طريقو ومكين لا تضامن لا لايك لا تعليق لا والو. العلاقة تقطعات واخة بجوج كانو كيكملو بعضياتهم ونجاح أمير الرواني ارتبط بسعد لمجرد لأنه مخرج الفيديو كليبات ديالو لي ضربو الملايين في المشاهدات.
وكيف كيقول المثل “مصائب قوم عند قوم فوائد”، وهادشي لي وقع للمخرج عبد الرفيع العبدلاوي لي كان دائما كيخدم مع الرواني قبل مايقلبوها صباط في اشهار ديال العقار لي دارتو أسماء لمنور ونجاح أغنية “عندو الزين”.
لي وقع حاليا، أن المغني سعد لمجرد اختار عبد الرفيع باش يكون مخرج أغنيتو جديدة “سلام” لي بايقاعات أمازيغية، وخدمة عبد الرفيع بانت زوينة، وهادشي خلاه ناشط وماشط باش تبان سميتو وترتبط بالبند العريض مع مول أغنية “لمعلم”.
ووصلات أغنية بعد يوماين من اصدارها 6.6 مليون مشاهدة في اليوتوب، ورقم مازال غادي يطلع.