حمد الله كذب خاليلوزيتش: ما اتصل بيا حد….حجي: حمد الله گال لي “ماشي أنتريسي فهاد لومومو وغانشجع المنتخب ورا التلفزيون”

عبد الرزاق حمد الله كذب وحيد خالوليزتش مدرب المنتخب المغربي اليوم الخميس،فاش گال فالندوة الصحافية أن حمد الله ما بغاش يجي يلعب الماتشات ديال ليبيا غدا الجمعة في الملعب الشرفي بوجدة والگابون في ملعب طنجة نهار الثلاثاء جاي.
حمد الله دار سطوري جديد وكذب فيه الناخب الوطني وكتب “ما تصل بي حتا واحد لا المدرب ولا الجامعة”.
لكن مصطفى حجي المدرب المساعد مادارش الروطار ورد بزربة على حمد الله. وأكثر من هدا قدم تفاصيل الكلام لي دار بينو وبين هاد اللعاب في التلفون.
حجي أكد أن حمد الله موجود فاللائحة الأولية، لي فيها 50 لاعب، وكان غادي يكون فلاليست فينال، ولكن لقينا صعوبة باش نتكلمو معاه، على الأقل باش نقلو ليه كلام من المدرب، خصوصا أن السلوك ديالو تغير فالماتشات الأخيرة.
حجي أكد أنه نور الدين أمرابط عطاه نمرا جديدة ديال حمد الله لي كلمو فيها لحقاش ما بقاتش عندو النمرة القديمة. “اهضرت معاه من بعد وگلتليه أن المدرب كيعول عليك، لكن خاصك تغير شوية الكومبورتمون ديالك، لأنك فالماتشات الأخيرة رجعتي كيتقلق وأقل مردودية من العام لي فات وخاصك تزيد تخدم، وغادي تكون مع المنتخب. وگلتليه أن المنتخب مفتوح ليك وان المدرب عوال عليك فالماتشات الرسمية لي غادي تكون في نونبر جاي”.
حجي أعطى التفاصيل كاملة ديال الحوار، وأكد “حمد الله گال ليا بالحرف خويا مصطفى غادي نوقفك دابا. المنتخب المغربي عزيز عليا وكنحب بلادي بزاف، وفهاد لاسيتياسيون، المدرب جديد ومادارنيش فلاليست جوج مرات، دابا ما رانيش انتريسي بغيت نبقا مركز مع فرقتي. عندي بزاف ديال الحوايج فراسي جو نو سوي با موتيفي. ودابا غادي نبقا نشجع المنتخب من ورا التلفزيون كمغربي كيحب بلادو”.