القضية كبرات. قاضية متهمة بمنع اعتقال شخص متهم بالنصب من الدرجة العليا

قال مصدر ل”كود” ان قاضية ما خلاتش عناصر الفرقة الولائية الجنائية بكازا تعتاقل احد المتهمين اللي كيوصفوه باللي من “أخطر النصابين على الصعيد الوطني”. وفق ما علمته “كود” فان هاد القرار ضيع مجهود شهور من البحت والتتبع والترصد لوصول لرأس المدبر للاكبر شبكة النصب والاحتيال والتزوير صدرت في حقه مجموع مذكرات بحت على الصعيد الوطني .
هاد الشي وقع فالمحمدية والبوليس كان معاهم الجدارمية حقاش الدار اللي فيها تابعة ترابيا ليهم. وفق مصدر “كود” باللي قالت ليهم بان الشقة ديالها ما فيها حد وباللي ما نخليكمش دخلو ليها.
المصدر قال ل”كود” بان هاد المتهم بالنصب من الدرجة الاولى راجل هاد القاضية.
هاد الشخص متهم بالنصب على شركات بيع السيارات “هيونداي” و”بوجو” اللي سبق ل”كود” وجبدات الموضوع
دابا التحقيقات توصلت ان ممتلكات هاد الشخص اللي كان كيوجد يغادر المغرب بطريقة غير شرعية٬ كاتب ديورو لوالدتو ولاختو. التحقيقات دابا كتشمل حتى ممتلكات مراتو القاضية اللي مازال ما سرحاتش بيهم في اطار التصريح بالممتلكات
القضية غادية وتكبار. اشهر وهما تابعينو حتى عرفو باللي كيتحرك ب”رانج سبور”