الانتخابات الاسبانية. الناس فقدو الثقة فاليمين المعتدل وباغيين اليسار واليمين الراديكالي الحزب الشعبي فقد نصف الناس لي كيصوتو عليه

مفاجئة كبيرة بيناتها النتائج الجزئية الاسبانية، من بعد ما تعلن أن الحزب الشعبي يالاه جايب 65 مقعد، وهو اللي كان جايب137 سنة 2016.
هاد النتائج غاتكون كارثية على الحزب اليميني المعتدل، بينما الاشتراكيون تزاد عندهم الاصوات.
السؤال اللي كيطرحو الشارع هو فين مشاو أصوات الحزب الشعبي، لأن المشكل ماشي في أنهم يمشيو عند أحزاب أخرى، بل أنهم يمشيو لأحزاب راديكالية بحال بوديموس وبوكس.
وطبعا يلا تبدلت النتائج راه يقدر حزب سيودادانوس ينافس الحزب الشعبي على الرتبة الثانية، رغم أن هادشي قبل الازمة الاقتصادية كان مستحيل يفكر فيه شي اسباني.
أضف أن التصويت اليوم عقابي على الحزب الشعبي، بسباب قياداته السابقة، الي عندها فضائح فساد مالي.