شابو. كلية بنمسيك ديما سابقة عصرها. بعد مسرح دولي واجازات مهنية فالثقافة والفن والتواصل جا وقت ماستر دولي فالسياسات الثقافية

كلية الاداب والعلوم الانسانية بنمسيك فكازا التابعة لجامعة الحسن الثاني 2 ديما سباقة على زمانها. كلية دارت فاحد اخطر احياء الدار البيضاء: حي مولاي رشيد ومع ذلك نجحات فاش تكون واحدة من اشهر كليات الاداب فالمغرب.
بنمسيك بدات مختالفة. مع العميد الاسبق حسن الصميلي عرفات ثورة فالجامعة المغربية حينها. خرج المهرجان الدولي للمسرح الجامعي. قبل كاع المهرجانات. كان دولي بصاح. كينظموه ومازال الطلبة والجامعة. تبعو مهرجان فن الفيديو. كان هاد الفن ما معروفش كاع فالبلاد. خرجو تجارب فنية واعرة. واحد منهم منير الفاطمي. جاب سينمائيين واعرين ومسرحيين معروفين واساتذة مختالفين.
تخلقات اجازات تطبيقية فالتنشيط الثقافي فالتواصل فالسمعي البصري فالفنون التشكيلية. 4 الاجازات.
هاد الجامعة اللي عرفات تراجع كبير فعهد مبارك ربيع غير المأسوف عليه واللي اثر على ريادتها وخبرق مهرجانها٬ باش مشى فحالو رجعات الجامعة بريقها. خداها واحد من اولادها. عبد القادر كنكاي. قرى فالادب العربي تخصص لسانيات وكان من المشرفين على الاجازة التطبيقية فالتنشيط الثقافي.
هاد العميد النشيط دار خطوة جديدة تخلي بنمسيك كيف كانت ديما. سباقة مجددة وزاعمة فتجريب افكار متقدمة. البارح الاثنين 18 فبراير تم الافتتاح الرسمي لماستر دولي. عادي لجامعة بحال هادي. دوزات الاجازة التطبيقية وكانت عندها تجارب فالماستر فتخصصات مختلفة توصل لماستر دولي.
هاد الماستر غادي يكون متخصص “في السياسات الثقافية والحكامة الثقافية للموسم الجامعي 2019-2018”. هادا جديد ماشي غير فالمغرب وعند العرب بل فافريقيا. مؤسسات دولية داخلة فشراكة معاه: مؤسسة المورد الثقافي و كرسي اليونسكو للسياسات الثقافية للفنون في التنمية بجامعة هيلدسهايم بألمانيا.