الكاتب العام لوزارة الصحة ل”كود”: الوضعية الوبائية عادية جدا فالمغرب مقارنة مع السنوات الفايتة والدوا ديال إنفلونزا موجود

omarelmouzaine@gmail.com
أوضح البروفسور هشام نجمي، الكاتب العام لوزارة الصحة، أن الوضعية الوبائية ف المغرب عادية جدا بالمقارنة مع السنوات الماضية من سنة 2009 إلى حدود هاد السنة، اي عشر سنوات فيها الحالة عادية ومكاينش شي تخوف.
وبخصوص هاد الشتا لي كتطاح واش تقدر تضاعف اكثر الفيروس ديال إنفلونزا، قال الكاتب العام ديال الوزارة، في تصريح لكود: “لا معندها حتى علاقة ويمكن يلا امتدات الفترة ديال البرد الشديد ممكن تزيد شويا فداك الفترة لي كتكون فيها الإنفلونزا الموسمية”.
وأضاف المتحدث قائلاً: “لي خاص المغاربة يعرفو دبا أن الفيروس كيكون مع التغيرات ديال الحرارة، مني كتكون كتدوز من واحد الحرارة مرفعة إلى البرودة لي شديدة وهنا كتعاون فهاد الفيروس”.
وبخصوص واش كاين حقن ديال هاد الفيروس ف السوق، تابع الكاتب العام ديال الوزارة، قائلاً: “كاين التلقيح موجود ف الصيدليات وكاين بشكل كافي عند المختبر لي كيسوقو، وكاين الدوا لي كيكون الاستعمال ديالو ف المستشفيات والمصحات، وراه الدوا متوفر كيف ديما، ومكاين حتى شي تخوف والأمر عادي جدا”.