عملية كبيرة للBNPJ ف اكادير

omarelmouzaine@gmail.com
المديرية العامة للأمن الوطني صيفطات عناصر من الفرقة الوطنية للشرطة القضائية إلى عاصمة سوس أكادير. ووفق ما أفادت عنه مصادر “كود”، فإن “لابيجي” ديال مفوضية تيكيون لي تابعة لولاية أمن أكادير، تمكنت بتنسيق مع الفرقة الوطنية، اليوم الخميس، من توقيف واحد البزناز عندو بزاف ديال السوابق.
هاد البزناز، حسب مصادرنا، كان روشرشي ولقات عندو الفرقة الوطنية 184 كيلو ديال لحشيش، و38 كيلو ديال الكيف و150 كيلو ديال مسحوق طابا، و25 كيلو ديال المعجون، بالإضافة إلى حجز 700 لتر من مسكر ماء الحياة، بالإضافة إلى جناوة من مختلف الأحجام ومبلغ 20 مليون سنتيم يشتبه في كونه من عائدات ترويج المخدرات.
دبا البوليس دارو هاد البزناز فالحراسة النظرية رهن إشارة البحث اللي تكلفات بيه الفرقة المحلية للشرطة القضائية تحت إشراف النيابة العامة المختصة، ومزال دبا الأبحاث والتحريات متواصلة لتوقيف شي متهمين مفترضين فهاد العملية الإجرامية.