الاستقلال تشوّه فالذكرى ديال 11 يناير والأتباع ديال شباط في فاس مقولبين نزار بركة بلا ميعيق

omarelmouzaine@gmail.com
حزب الاستقلال غادي وياكل ف لعصا وناوي يربح ف الانتخابات الجاية. بطبيعة الحال هادشي مستحيل يكون على عدة اعتبارات. حزب كان فيه الضو مني كانو فيه علال الفاسي وبوستة وغيرهوم من الناس لي كانو بصح خدامين. من انهار اطلع شباط أمين عام مشا الحزب للهاوية وف الأخير خوا ليهوم حتى المغرب.
نرجعو للذكرى ديال 11 يناير. اليوم الجمعة كان إنزال ديال عدد من الوجوه المعروفة ف حزب الميزان ف المنزل ديال احمد مكوان لي كاين ف حي البطحاء بمدينة فاس. نزار بركة الأمين العام ديال “الميزان” ترأس واحد التجمع خطابي بهاد المنسبة لكن الكارثة أن الوجوه لي محروقة ف الحزب داخل العاصمة العلمية مع الناس ديال لمدينة هوما لي كانو.
هاد الوجوه لي كتقصد “كود” هوما لي كانو مع شباط ف السابق وكولهوم مفتشين ديال الحزب. نزار بركة انهار جا للحزب بدل المفتشين ديال الجهات كولهوم إلا ديال فاس. هنا دار خطأ كبير بزاف، حقاش معارفش بأن شباط خلاهوم ليه بلعاني باش يهرسوه ويدكدكوه سياسيا.
الحزب على المستوى ديال فاس معمرو يزيد لقدام مادام ان مزال فيه الناس ديال الشباط.
الناس ديال فاس مابقاوش باغيين يسمعو هاد الاسم كاع وهادشي علاش صوتو على البي جي دي ف الانتخابات الأخيرة ولي خداو الرئاسة ديال فاس بأغلبية ساحقة.