الفنانين ديالنا طلعو كيطيرو غير في “المگابلات” وضربو طم فجريمة “شمهروش”

ملي شي مغني كيدير شي أغنية وااة تكون خايبة، كينوضو هادوك لي كيسميو راسهم فنانين كيطبلو ليه ويغنيو ليه، وفرحانين، ودايرين جهدهم كثر من النكَافات لي كيتخلصو بالفلوس، وملي كتكون شي حاجة فيها مصلحة البلاد والعباد، بنادم كيتكمش.
أسباب نزول هاد الكلام، هو أن الفنانين والممثلين لي زعما يا حسرة مؤثرين، وكيتبعوهم الملايين ديال البشر فالمغرب وخارجه، كلى المش لسانهم، وضربو أحسن طم كاين فالعالم، من بعد الجريمة الوحشية ديال ذبح سائحتين حدا شمهروش.
ها لي مقابلة الماكياج، وها لي مقابل شعرو، ولي مقابلة حشيان الهضرة ونت غادي… هاد الضربة ديال الغدر من ارهابيين دواعش حاقيرين قتلو جوج بنات ماحرك فيكم والو؟ والو؟ حتى كلمة وحدة بسيطة؟ مواساة؟ مساندة؟ والو زعما.
كون كان شي مكَابلة ديال الحمامات، كون نتوما الأولين والأولات.. ولكن بزاف عليكم المغرب، وناسو.