الستاتي: أنا لي حاس بالجوع لي عايشيون الناس.. وغادي نجول المغرب كامل ونصور واخة تكون عندي غير 4 دريال

الجدل لي رافق عبد العزيز الستاتي ملي مشى ساعد شي ناس مافحالهومش جهة اولماس كاعما أثر عليه، ولكن خلاه يفكر يدير جولة فالمغرب كامل.
الستاتي كتب واحد الستاتو على صفحتو في فايسبوك (ولا معرت كتبوها ليه)، قال أنه غادي يدير العملية واخة تكون عندو غير 4 دريال.
وأضاف “هاد 4 دريال أنا نقسمها مع المساكين حيث أنا اللي حاس بيهم، مريت من الجوع والبرد ودازت عليا”.
وعلى قضية تصوير المساعدة، قال الستاتي أن الهدف هو تحفيز الفنانين والرياضيين “وباش تاهوما ينوضو يتكاتفو ونشوفوهم تاهوما فالجبال ويعاونو الناس ويصورو لينا ويتفلعصو علينا فالخير ماشي نبقاو تصاورنا غا فالأفيشات وفالكوستارات والتكاشط”.
الستاتي قال أيضا أنه ما غاديش يتشرح وماغاديش يدخل السياسة “أنا عمرني نترشح أو ننتمي لشي حزب من غير المغرب أنا ديال لمغاربة كلهم، وغادي نبقا ديالهم بشعاري الخالد الله الوطن الملك”.