السيبة فسلا.. ها كيفاش تروّن أكبر شارع فتابريكت بسبب مشرمل كان هاز جنوية وها شنو دار

السيبة فسلا.. البارح الخميس فحدود الساعة 11 و30 دقيقة ليلاً كان واحد المشرمل هاز جنوية مخبيها ونوّض هلع كبير فوسط شارع محمد الخامس لي هو أكبر شارع فسلا. وحسب مصادر جد مطلعة، فإن هاد المشرمل أقدم على سرقة واحد السيد نزل من الطونوبيل ديالو باش يخرج فلوس من الكيشي أوطوماتيك ديال التيجاري وفا بانك.
المصادر لي كانت حاضرة لهاد الحادث كالت ل”كود” أن هاد المشرمل استغل خروج مول الطونوبيل باش يخرج لفلوس وافتح ليه الباب وخدا الهاتف وهرب قبالة المؤسسة البنكية وبالضبط فواحد لبلاصة إسمها مجموعة الفتح قبل أن يتم مطاردة هاد الشفار من قبل بعض المواطنين، حيث تمكن أحدهم من استرجاع الهاتف ديال داك السيد الذي ينحدر من وجدة وكان مرفوق بولد خوه.
المهم الضحية جابو ليه المواطنين الهاتف ديالو ومشا فحالو. المصادر أكدت انه تم إشعار مصالح الأمن بمدينة سلا بهاد الحادث وجاو جوج عناصر أمنية من فرقة الدراجين وسيارة النجدة ودارو حملة تمشيطة فالمكان اللّي هرب منو هاد الزرام اللّي باين غريب على منطقة تابريكت.