فضيحة النكرة اللي جر ميسي وشوهنا فالسوبر كوب فطنجة. علاش وصل تماك وكون كان ارهابي وفجر ميسي و5 الوزرا مغاربة؟

لا ناس الجامعة عرفوه لا البوليس ديال طنحة لقاو اصلو لا البوشحاتي اللي بان حداه فالصورة فهم شي حاجة. انه اللغز المحير. مول القاميجة البيضا اللي جر البارح ليونيل ميسي نجم البارصا بعد ما خدا الميدالية وبغى يدير معاه سيلفي.
مول القاميجة عليه روايات كثيرة. شي كيكول ريفي تاجر مرفح بحال عدد من ناس المنطقة وشي كيقول محتال ومدعي وصافي وشي كيقول مواطن عادي عندو سنطيحة كبيرة وصل حتى للمنصة الشرفية.
هاد الهدرة ديال شكون ماشي مهمة دابا لفضيحة هو كيفاش وصل لتماك. المنسق العام لتنظيم الماش معاد حجي ما عطى حتي شي جواب دابا. هو المسؤول مسؤولية واضحة فهاد القضية.
البارح فالمنصة الشرفية كانو جوج وزراء داخلية من المغرب واسبانيا وجوج وزراء مغاربة فالشبيبة والرياضة والثقافة والاعلام ووزير الرياضة والثقافة الاسباني ورؤساء جامعات المغرب واسبانيا والبرتغال ورئيس الكاف ونائب رئيس الاتحاد الاوربي لكرة القدم وكاين نجوم بحال ميسي. كون كان هادا ارهابي اش غادي يوقع غدا فطنجة.
كيفاش نكرة دخل ووصل لهاديك بلاصة هادي فضيحة امنية كبيرة بزاف بزاف بزاف. دابا المسؤول عليها اولا هو منسق التنظيم. كاينة فضاىح اقل خطورة بحال شي وحدين كانو تماك وما عندهمش الصفة. هادا موضوع اخر دابا نرجعو ليه