الياس العماري كيروج: جراو على بوسعيد بسباب “ساهام” وها علاش بغى ينتاقم من بوسعيد ومن العلمي

قالت مصادر ل”كود” ان الياس العماري رئيس جهة طنجة الحسيمة اعتبر ان اقالة وزير المالية والاقتصاد محمد بوسعيد من منصبه كانت بسبب صفقة بيع “ساهام” للشركة الجنوب افريقية. بغى يقول ان مالك اسهم ساهام مولاي حفيظ العلمي وزير التجارة والصناعة والتكنلوجيات الحديثة اللي من نفس حزب وزير المالية المقال: التجمع الوطني للاحرار وباللي كان فراسو هاديك الضريبة على الشركات اللي كتؤديها الشركة اللي شرات ماشي اللي باع.
وفق مصدر “كود” فالياس العماري اللي كان هاد وسط الاسبوع فرحلة علاجية بمالقة وقالها لصحابو وللمقربين منو باللي سباب اقالة بوسعيد هو هاداك الشي ديال اقتناء ساهام من قبل شركة جنوب افريقية.
لكن علاش سوق الياس العماري كيف عادتو هاد السبب وهو متأكد انو ماشي بصاح؟ اولا باش ينتاقم من بوسعيد حقاش واخا كان صاحبو بزاف فالاخير طلب منو كرئيس الجهة شي امور عندها علاقة بالمالية ورفضاتها ليه الوزارة. ثانيا باش ينتاقم من مولاي حفيظ العلمي حقاش فرشو باللي كلشي هاداك الشي ديال الصين واستثمار الصين كذوب فكذوب وحتى فقضية شركة “ديلفي” اللي بغى يركب عليها الياس العماري واخا هي الداخلية ووزارة العلمي اللي حلاتها