تفراق لمغاربة للتونيات والدرابوات فروسيا برزط. صحافي روسي سول المدرب فالندوة وها جوابو وها قصة هاد التوزيع

لمغاربة من نهار بداو هاد المونديال وهما كيفرقو التونيات والدرابوات فصاكادوات صغار فيهم الراية المغربية على المشجعين. مصدر ل”كود” قال باللي تصيبات شي 80 الف توني ومعاهم الراية وهاد الصاكادو. دارت هاد العملية بسان بيترسبورگ ودارت حتى فموسكو وبدات البارح فكالينيگراد وغادية تستمر اليوم قبل الماتش مع الثمنية فالعشية حسب التوقيت المحلي التاسعة حسب توقيت موسكو.
المشكلة فهاد الشي هو ان الموضوع خدا بعد اخر. صحافي روسي ف”انتر طاس” البارح فالندوة الصحافية البارح الاحد 24 يونيو 2018 سول مدرب الاسود ايرفي رونار على الموضوع. على قضية توزيع هاد الشي على الجمهور. رونار رد عليه “كانت 40 الف مغربي جات فكل ماتش =ايران والبرتغال=. ما فرقنا عليهم لا تونيات ولا والو. شفتوهم كيف كانو فالنشيد الوطني. هاديك لحظة استثنائية كنشكر عليها الجمهور المغربي” واكد انو ما فراسو والو من هاد الهدرة ديال التوزيع.
اللي كاين هو ان الجامعة من خلال مديرية الماركوتينگ كانت عارفة عدد لمغاربة لكبير اللي جاي من اوربا ولا بغات دير عملية للمغرب عبر التوني وجابت هاد العدد لكبير من التونيات ودارت عملية توزيع. كاين فريق متخصص فهاد الشي. فموسكو دارت خيمة مغربية لهاد الغرض. هاد الشي داز وقف مصدر “كود” مزيان “شي مرات كيجي شي بوليس روسي كيشوف. كيصحبنا كنبيعوهم. باش كيشوفنا كنوزعوهم كيمشي وكنعطيوهم حتى هما تونيات”. حتى السفارة المغربية هنا فموسكو دارت يد الله فهاد العملية.