كانو غادي يغرقو الطاليان بالحشيش. وحدات بحرية إيطالية حجزات 10 طن من الحشيش فوق باخرة جاية من المغرب (فيديو)

علنات الجمارك الإيطالية فجزيرة “صقلية” ، أن الوحدات البحرية ديالها حجزات لبارح فعرض السواحل الصقلية 10 ديال الأطنان من مخدر الحشيش ، وشدات 9 ديال الأشخاص فمركب صيد جاي من المغرب وغادي لليبيا.
وقالو جمارك صقلية بلسان مسؤولينها ، أن العناصر ديالها قدرات ترصد الحركات المشبوهة لمركب صيد كيحمل راية هولندا ، انطالق من جزيرة “مالطا” منذ أيام باش يقوم بجولة فعرض المتوسط وصولا لحدود مضيق جبل طارق ، وفاش رجع توقف ما بين الناظور و وهران ، الشيء لي أثار إنتباه المحققين ، حيت هاذ السيناريو تكرر بزاف مؤخرا هاد السنوات .
وقالو المحققين أن عملية تهريب الحشيش من المغرب لليبيا ، كتوقف موراها شبكات أوروبية منظمة ، قدرات تخلق معبر بحري بين المغرب وليبيا لنقل الحشيش ، وصرحو بإستحالة رصد جميع البواخر والمراكب الي كتهرب الحشيش، نظرا للنشاط الكبير الي كتعرفو حركة الملاحة البحرية فهاذ المنطقة .