البحرية الإسبانية طارت على فلوكة ديال الحراكة أكثر من النص فيها قاصرين مغاربة

اعتارضات البحرية الإسبانية التابعة لميناء سبتة المحتلة، اليوم الأربعاء، فلوكة كانت هازة 14 مهاجر كلهم من جنسية مغربية، بينهم 8 ديال القاصرين، كانو ناويين يحركو لجنوب إسبانيا .
وحسب الإفادة ديال الحرس المدني الإسباني، فتم إعتراض الفلوكة ما بين الساعة 7 و 8 ديال الصباح، بالقرب من ساحل مدينة سبتة السليبة، وهي شادة الطريق للسواحل الجنوبية ديال إسبانيا، و غير تم رصد التحركات ديالها، وهي تبعها البحرية الإسبانية وحبساتها، وقامت بنقل جميع المهاجرين المغاربة لميناء المدينة وعددهم 14 حراك 8 منهم قاصرين .
وغادي تنقل الشرطة الإسبانية هاد القاصرين لمراكز الإيواء الخاصة بيهم، أما المهاجرين البالغين فغادي تسلمهم لمصالح الأمنية المغربية بالمعبر الحدودي “تراخال” .