حسبان ناشط باع 22 ألف تذكرة في يومين وزاد طبع التذاكر باش ادخل لفلوس

تمكن فريق الرجاء الرياضي في ظرف يومين من أنه ابيع 22 ألف تذكرة للماتش ديالو مع فريق حسنية أكادير، بعدما طرحوا التذاكر للبيع يوم أمس (الجمعة).
وتباعت البارح 12 ألف تذكرة واليوم إلى حدود الثانية زوالا تباعت 10 آلاف تذكرة، ليكون المجموع 22 ألف تذكرة في أقل من يومين، داكشي علاش مشى حسبان رفع عدد التذاكر من 35 ألف تذكرة إلى 45 ألف تذكرة وهو أقصى حد من التذاكر.
وغادي استافد الرجاء من مبلغ مالي جد مهم خصوصا أن عملية البيع غادي تبقى مستمرة حتى ليوم الاثنين المقبل يوم المباراة أمام فريق حسنية أكادير.
ومعول حسبان بشكل كبير على المداخيل ديال هاد المباراة باش اتمكن من صرف بعض المستحقات المالية للاعبين، والموظفين ديالو، باش اخفف من الأزمة المالية ديالهم.
فوز الرجاء في المباراة ديال يوم الاثنين غادي اخليه اولي في المرتبة الأولى في الدوري الاحترافي لكرة القدم، وغادي ازيد افرح الجماهير ديالو بعد التأهل لنصف نهائي كأس العرش.